Croeso i Ddesg y Wasg yn Nhŷ’r Cwmnïau

Sut gallwn ni helpu?

Mae gan Dŷ’r Cwmnïau wasanaeth gwasg bach er budd y cyfryngau newyddion, gwasg y fasnach a’r diwydiant adloniant. Oherwydd hyn, er ein bod yn croesawu diddordeb proffesiynol yn Nhŷ’r Cwmnïau, allwn ni ddim ymdrin fel rhan o’r drefn â chwiliadau am wybodaeth ar y gofrestr cwmnïau. Yn ffodus, dyma rywbeth y caiff unrhyw ymwelydd o’r cyfryngau ei wneud drosto’i hun, a hynny drwy gyrchu’n gwasanaethau ar-lein ardderchog. Mae’r gwasanaethau sylfaenol ar gael yn rhad ac am ddim.

Mae’r rhain yn cynnwys:

Llyfrynnau Canllaw
Mae’r rhain yn nodi cyfrifoldebau cyfarwyddwyr ac yn rhoi gwybodaeth a’r amserau allweddol ar gyfer gweinyddu a rheoli cwmnïau (penodi cyfarwyddwyr, cyfrifon, cyfranddeiliaid, etc), ffurfio cwmnïau a’u cofrestru, dirwyn cwmnïau i ben, rhwymedigaeth gyfyngedig a deddfwriaeth berthynol arall.

Ein Gwasanaethau
Mae’r rhain yn manteisio ar y cofnodion cyhoeddus helaeth, gan restru’r cyfleusterau chwilio sydd ar gael a chynghori ar sut i’w cyrchu. Ceir gwybodaeth syml, sylfaenol am ddim. Ar ben hynny, mae’r holl wybodaeth safonol sydd  ar gael yn gyhoeddus ac y bydd arnoch chi fel cydweithiwr yn y Wasg ei hangen ar gael drwy’n cyfleuster rhagorol 'WebCHeck' neu drwy 'Companies House Direct'. Gwasanaeth tanysgrifio yw hwn ac mae’n costio o £5 y mis. Mae’r gwasanaethau hyn ar gael o ddydd Llun i ddydd Sadwrn 7:00am i 12 ganol nos, amser y Deyrnas Unedig ac ar y rhan fwyaf o’r Gwyliau Banc a dydd Sul olaf y mis, sy’n caniatáu i waith cynnal-a-chadw hanfodol gael ei wneud.

Byddwch cystal â defnyddio’r gwasanaethau hyn cyn ichi gysylltu’n unionyrchol â ni, gan fod modd derbyn bod yr e-gofnod cyhoeddus yn awdurdodol i’r graddau y mae cwmnïau wedi dweud wrthon ni am eu statws. Yr unig wybodaeth y gallwn ni ei chyrchu yw’r un wybodaeth ag sydd ar gael i chithau, felly fydd yna fawr ddim byd y gallwn ninnau ei ychwanegu fel Desg y Wasg at yr hyn y gallwch chithau ei weld eisoes o ran yr wybodaeth sy’n cael ei dangos naill ai ar y gofrestr neu yn ein llyfrynnau canllaw.
Er hynny, fe allwn ni helpu neu roi cyngor ar y canlynol:

• Sylwadau ffurfiol am sut rydyn ni’n cymhwyso’r gyfraith ynghylch y gofrestr, canllawiau ac eglurhad ar ganllawiau a chwestiynau am rôl y Cofrestrydd.
• Gwybodaeth ystadegol am y gofrestr.
• Trefnu cyfweliadau ffurfiol gydag uwch-gydweithwyr ar gyfer erthyglau o sylwedd a chyhoeddiadau masnach.
• Gwybodaeth am gyflwyno Deddf Cwmnïau 2006 (ar gael ar y wefan hefyd).
• Cyngor am ein rolau a’n cyfrifoldebau ni fel asiantaeth weithredol yn yr Adran Busnes, Menter a Diwygio Rheoleiddio.
• Helpu rhaglenni o ddiddordeb i ddefnyddwyr, etc, os bernir bod hynny’n briodol.

Os oes gennych faterion eraill sydd heb eu crybwyll uchod, fe fyddem yn fodlon eu trafod, a’u datrys lle bo modd neu eich anfon yn y cyfeiriad cywir.

Mae Desg y Wasg yn Nhŷ’r Cwmnïau ar gael o 09:00 am i 17:00 pm dydd Llun i ddydd Gwener, ac eithrio Gwyliau Cyhoeddus.

Cewch gysylltu â Desg y Wasg i ddechrau drwy’n Canolfan Gysylltu a fydd yn gofyn am eich manylion a natur sylfaenol eich galwad. Mae’n bosibl y byddan nhw’n gallu helpu heb fod angen eich cyfeirio at Ddeg y Wasg. Ffôn: +44 (0)303 1234 500, Minicom 029 20381245. Er hynny, yn gyffredinol rydyn ni’n gallu bod yn fwy effeithiol wrth ateb eich ymholiadau dros yr e-bost ac rydym yn eich gwahodd i gysylltu â ni drwy press@companieshouse.gov.uk Os anfonwch chi y tu allan i oriau, byddwn yn gwneud ein gorau glas i ymateb cyn gynted â phosibl wedyn.